Сборник - Часослов с приложением (цсл) Страница 56

Я́ко сотвори́ Мне вели́чие Си́льный, / и свя́то И́мя Его́, / и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, / расточи́ го́рдыя мы́слию се́рдца их.

Низложи́ си́льныя со престо́л / и вознесе́ смире́нныя, а́лчущия испо́лни благ и богатя́щияся отпусти́ тщи.

Восприя́т Изра́иля, О́трока Своего́, помяну́ти ми́лости, / я́коже глаго́ла ко отце́м на́шим, / Авраа́му и се́мени его́, да́же до ве́ка.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь святаго пророка Захарии, отца Предтечева:

Благослове́н Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м.

И воздви́же рог спасе́ния нам / в дому́ Дави́дове, о́трока Своего́.

Я́коже глаго́ла усты́ святы́х, су́щих от ве́ка проро́к Его́, / спасе́ние от враг на́ших / и из руки́ всех, ненави́дящих нас.

Сотвори́ти ми́лость со отцы́ на́шими / и помяну́ти Заве́т Святы́й Свой.

на 8: Кля́тву, е́юже кля́тся ко Авраа́му, отцу́ на́шему, / да́ти нам без стра́ха, из руки́ враг на́ших изба́вльшимся.

Служи́ти Ему́ преподо́бием и пра́вдою / пред Ним вся дни живота́ на́шего.

на 6: И ты, отроча́, проро́к Вы́шняго нарече́шися, / преды́деши бо пред лице́м Госпо́дним, угото́вати пути́ Его́.

Да́ти ра́зум спасе́ния лю́дем Его́ / во оставле́ние грех их / милосе́рдия ра́ди ми́лости Бо́га на́шего.

на 4: В ни́хже посети́ нас Восто́к с высоты́, / яви́тися во тьме и се́ни сме́ртней седя́щим.

Напра́ви но́ги на́ша на путь ми́рен.

Сла́ва:

И ны́не:

Катавасия. Ектения: зане в сицевыя дни, Досто́йно: не поется. Таже ексапостиларий.

ПЕСНИ СВЯЩЕННАГО ПИСАНИЯ ВСЕДНЕВНИИ

Подобает ведати, аще несть неделя, ниже, Владычний, ниже Богородичный праздник, ни предпразднство, или попразднство их, или празднуемаго святаго, стихословятся песни скоро сице.

Песнь 1. Первый лик глаголет:

Го́сподеви пое́м, сла́вно бо просла́вися. / Коня́ и вса́дника ве́рже в мо́ре.

Таже вторый лик:

Помо́щник и Покрови́тель бысть мне во спасе́ние, / Сей мой Бог, и просла́влю Его́; / Бог отца́ моего́, и вознесу́ Его́.

И паки первый лик:

Госпо́дь сокруша́яй бра́ни, / Госпо́дь И́мя Ему́, / колесни́цы фарао́новы, и си́лу его́ ве́рже в мо́ре.

Вторый лик:

Пучи́ною покры́ я́, / погрязо́ша во глубине́, я́ко ка́мень.

От зде начинай стихи в случившийся глас канона и глаголи ирмос со стихом и по чину тропари:

Огусте́ша я́ко стена́ во́ды, / огусте́ша и во́лны посреде́ мо́ря.

Глаголи ирмос.

Рече́ враг: гнав пости́гну, / разделю́ коры́сть, испо́лню ду́шу мою́, / убию́ мече́м мои́м, госпо́дствовати бу́дет рука́ моя́.

Глаголи тропарь.

Посла́л еси́1 Дух Твой, покры́ я́ мо́ре, / погрязо́ша, я́ко о́лово, в воде́ зе́льней.

Кто подо́бен Тебе́ в бозе́х, Го́споди, / кто подо́бен Тебе́; просла́влен во святы́х, / ди́вен, сла́вно творя́й чудеса́.

Просте́рл еси́ десни́цу Твою́, / пожре́ я́ земля́; / наста́вил еси́ пра́вдою твое́ю лю́ди Твоя́ сия́, я́же изба́вил еси́.

Уте́шил еси́ кре́постию Твое́ю во оби́тель святу́ю Твою́. / Слы́шаша язы́цы и прогне́вашася, / боле́зни прия́ша живу́щии в Филисти́ме.

на 8: Тогда́ потща́шася влады́ки Едо́мстии / и князе́й Моави́тских, прия́т я́ тре́пет, / раста́яша вси, живу́щии в Ханаа́не.

Нападе́т на ня страх и тре́пет, / вели́чием мы́шцы Твоея́ да ока́менятся.

на 6: До́ндеже про́йдут лю́дие Твои́, Го́споди, / до́ндеже про́йдут лю́дие Твои́ си́и, я́же стяжа́л еси́.

Соде́лал еси́, Го́споди, / святы́ню, ю́же угото́васте ру́це Твои́.

на 4: Госпо́дь ца́рствуяй ве́ки, и на век, и еще́, / егда́ вни́де конь фарао́нов с колесни́цами и вса́дники в мо́ре.

Сы́нове же Изра́илевы проидо́ша су́шею посреде́ мо́ря.

Сла́ва:

И ны́не:

Подобает ведати, яко вторая песнь никогдаже стихословится, токмо в Великой Четыредесятнице во вторники.

Песнь 3.

Утверди́ся се́рдце мое́ во Го́споде, / вознесе́ся рог мой о Бо́зе мое́м, / разшири́шася уста́ моя́ на враги́ моя́, / возвесели́хся о спасе́нии Твое́м.

Я́ко несть свят, я́ко Госпо́дь, / и несть пра́веден, я́ко Бог наш, / и несть свят, па́че Тебе́.

Не хвали́теся и не глаго́лите высо́кая в горды́ни, / ниже́ да изы́дет велере́чие из уст ва́ших.

Я́ко Бог ра́зумов Госпо́дь / и Бог, уготовля́яй начина́ния Своя́.

Начинай: Лук си́льных изнемо́же, / и немощству́ющии препоя́сашася си́лою.

Испо́лненнии хле́бов лиши́шася, / и а́лчущии прише́льствоваша зе́млю.

Я́ко непло́ды роди́ седмь, / и мно́гая в ча́дех изнемо́же.

Госпо́дь мертви́т и живи́т, / низво́дит во ад и возво́дит.

Госпо́дь убо́жит и богати́т, / смиря́ет и вы́сит, / возставля́ет от земли́ убо́га / и от гно́ища воздвиза́ет ни́ща.

Посади́ти его́ с могу́щими люде́й / и престо́л сла́вы насле́дуя ему́.

на 8: Дая́й моли́тву моля́щемуся / и благослови́ ле́та пра́веднаго.

Госпо́дь не́мощна сотвори́ супоста́та Его́, / Госпо́дь свят.

на 6: Да не хва́лится прему́дрый прему́дростию свое́ю, / и да не хва́лится си́льный си́лою свое́ю, / и да не хва́лится бога́тый бога́тством свои́м.

И твори́ти суд и пра́вду посреде́ земли́.

на 4: Госпо́дь взы́де на небеса́ и возгреме́, / Той су́дит конце́м земли́, пра́веден Сый.

И даст кре́пость царю́ на́шему / и вознесе́т рог Христа́ Своего́.

Сла́ва:

И ны́не:

Таже поем ирмос третия песни последняго канона, в который любо день случится; подобне и в седмую шестыя песни ирмос, и в девятую осмыя, и по девятой девятыя. По прочих же песнех, рекше по первой, по четвертой, по пятой, по седмой, егда поется осмогласник с Минеею, во все лето не глаголется ирмос от Минеи, кроме сих, яже зде указашася.

Песнь 4.

Го́споди, услы́шах слух Твой и убоя́хся; / Го́споди, разуме́х дела́ Твоя́ и ужасо́хся.

Внегда́ смути́тися души́ мое́й во гне́ве, ми́лость Твою́ помяне́ши.

Бог от ю́га прии́дет, / и Святы́й из горы́ приосене́нныя ча́щи.

Покры́ Небеса́ доброде́тель Его́, / и хвалы́ Его́ испо́лнь земля́.

Начинай: Вложи́л еси́ во главы́ беззако́нных смерть, / воздви́гл еси́ у́зы да́же до вы́и в коне́ц.

Разсе́кл еси́ во изступле́нии главы́ си́льных, / стрясу́тся в ней, / разве́рзут узды́ своя́, / я́ко снеда́яй ни́щий тай.

Изве́л еси́ на мо́ре ко́ни Твои́, / смуща́ющия во́ды мно́ги.

Сохрани́хся, и убоя́ся се́рдце мое́ / от гла́са моли́твы усте́н мои́х.

И вни́де тре́пет в ко́сти моя́, / и во мне смяте́ся кре́пость моя́.

Почи́ю в день ско́рби моея́, / да взы́ду в лю́ди прише́льствия моего́.

на 8: Зане́ смоквь не плодопринесе́т, / и не бу́дет ро́да в лоза́х.

Солже́т де́ло ма́слинное, / и поля́ не сотворя́т я́ди.

на 6: Оскуде́ша о́вцы от пи́щи, / и не бу́дет воло́в при я́слех.

Аз же о Го́споде возра́дуюся, / возвеселю́ся о Бо́зе, Спа́се мое́м.

на 4: Госпо́дь Бог мой си́ла моя́, / и учини́т но́зе мои́ на соверше́ние.

И на высо́кая возво́дит мя, / победи́ти ми в пе́сни Его́.

Сла́ва:

И ны́не:

Песнь 5.

От но́щи у́тренюет дух мой к Тебе́, Бо́же, / зане́ свет повеле́ния Твоя́ на земли́.

Пра́вде научи́теся, живу́щии на земли́.

Начинай: Го́споди, высока́ Твоя́ мы́шца, и не ве́деша, / разуме́вше же, постыдя́тся.

За́висть прии́мет лю́ди ненака́занныя, / и ны́не огнь супоста́ты поя́ст.

Го́споди Бо́же наш, мир даждь нам, / вся бо возда́л еси́ нам.

Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.

Ме́ртвии же живота́ не и́мут ви́дети, / ниже́ вра́чеве воскреся́т.

Сего́ ра́ди наве́л еси́, и погуби́л, / и взял еси́ всяк му́жеск пол их.

на 8: Приложи́ им зла, Го́споди, / приложи́ зла сла́вным земли́.

Го́споди, в ско́рби помяну́хом Тя, / в ско́рби ма́ле наказа́ние Твое́ нам.

на 6: И я́ко боля́щая приближа́ется роди́ти / и в боле́зни свое́й вопия́ше, / та́ко бы́хом Возлю́бленному Твоему́.

Не паде́м, но паду́т живу́щии на земли́.

на 4: Воскре́снут ме́ртвии, и воста́нут, и́же во гробе́х, / и возвеселя́тся, и́же на земли́.

Роса́ бо, я́же от Тебе́, исцеле́ние им есть, / земля́ же нечести́вых паде́т.

Сла́ва:

И ны́не:

Подобает ведати, яко шестая песнь не стихословится, но глаголем ирмос и един тропарь без стиха, зане не имать шестая песнь множайшия стихи, яко прочия, подобне же и седмая, и девятая песни.

Седмая же стихословится вся в субботах Святыя Четыредесятницы.

Песнь 6.

Возопи́х в ско́рби мое́й ко Го́споду Бо́гу моему́, / и услы́ша мя.

Отве́ргл мя еси́ во глубины́ се́рдца морска́го, / и ре́ки обыдо́ша мя.

Вся высоты́ Твоя́ и во́лны Твоя́ на мне преидо́ша.